ياللي على روس المراقيـب وقتـي

ياللي على روس المراقيب وقتي
نجمك بدا يشع في كل الافاق

عندي نصيحة حق لو كان ضقتي
مستقبلك والطهر والغي بسباق

شومي عن اللي يتبعك كان فقتي
من بهرجة عاشق وخاين ولفاق

تراك دره نادره لو صدقتي
مع هاجسٍ ياتيك من بين الاعماق

جوزي عن اللي يطردك لاسبقتي
وارضى صدوق الود من كل الاذواق

ريع الذياب يلوثك لو مرقتي
للرجل في تالي مهاويه مزلاق

كثر المعارف ترشحك لاعرقتي
وترميك في داخل ملفات وانفاق

ارقي على ظهر الجبل لاشرقتي
كبي عديمين المبادي والاخلاق

بكره يجيك العلم لامن غرقتي
في وحل من زيف المشاعر والاشواق

ذكرك يملونه ليامن فرقتي
عن الطريق اللي له العقل يشتاق

عطرك يفوح وينتشر لا برقتي
وتطلع بصامات الفشل فوق الاوراق

الدرب قدمك فكري لازرقتي
امشي بجنب الحيط لاترفعي ساق

سبقك تعدا كل سابق وفقتي
من كان قبلك سيرته تبني اطباق

هذي شهادة حق كانك وثقتي
في قول من حده على القول ميثاق

انتي لحالك بالتميز لحقتي
اللي سبق قبلك ومن جاك لحاق

كل الكروت اللي لغيرك حرقتي
سلبتي الموضات من وسط الاسواق

اقسم قسم من جد بنك طرقتي
كل الخيول اللي على الزين سباق

لاتهميلن الراي مادام ذقتي
طعم الغدر لاجاك في شكل ترياق

اصلك عريب ومابعد يوم بقتي
يابنت من صيته مع الناس براق

ربعك شرفهم يعجبك يوم حقتي
في تالي اسمك للمناعير مشراق

انتي لحالك بس للجزل رقتي
مافيه غيرك قط في نظرتي راق

في عين من عزك على طول لقتي
جبتي مزاج الشاعر اللي ماينطاق

اعلن خضوعي كان للشوق طقتي
وانا منول ماطرد اللي نوا فراق

تم الكلام وكان غيري عشقتي
قولي وخلي جاري الدمع دفاق

وان كان هرجي ماعجبك وانحرقتي
قولي جزاه الله بالخير ماباق