صحبة الخير - عبدالله مرزوق المرشدي

اقول للي قال ماتحب يافلان
تقطف ثمار الورد لاصار مايل

احب اطيع الرب في كل الاحيان
واحب عادات العرب والقبايل

واختار لي من صحبة الخير رفقان
ينفع بهم فعل الكرم والجمايل

وافرح اليا شفت الخوي دوم فرحان
واضيق لاضاقت عليه الوسايل

واسج في جوٍ من الناس قفران
ماحطو البدوان فيه النزايل

يازين فيّ الطلح في وسط بران
يروق فيه الجو باحلى المقايل

كنك بوسط الروض في وسط بستان
تجري بوديانه كبار المسايل

والإ دفى نارٍ توقد بحطبان
لاهب نسناس الهوى من شمايل

في ربعةٍ ما رادها كل خوان
ولا طبها الكذاب راع النقايل

يرتاح بالي فيه لاصرت زعلان
وانسى همومي كلها والنكايل

واحب نظم الشعر موزون باوزان
والقاف ابدّع فيه زين المثايل

والبيض ماني في هواهن بهيمان
يسدني منهن غرام الحلايل

لوصادفن بالعين في شكل فتان
في حبهن ماني بصايل وجايل

واشيل هم اللحد مع هم الاكفان
واشيل هم الحشر يوم الهوايل

وان طعتني يا هوه فكر بحسبان
ترى الهوى والغي جرفٍ مهايل

وصلاة ربي عد ماهل ودان
واعداد حبات الرمل بالنثايل

على النبي المصطفى نسل عدنان
الصادق المصدوق راع الفضايل

© 2024 - موقع الشعر