سود الايام

بالرغم من هالكم من كم الارقام
مابه كفو لا أقبل الهم والضيق

شيخان مع ضباطنا الدون الاقزام
عند السوالف كل ابوهم مطاليق

ماقول كلهم لكن اكثرهم اصنام
ولا شك تبخصهم جميع المخاليق

مهما تجملهم منصات الاعلام
ماهو يزيّن قبحهم أي تلفيق

خصوصاً الطقعان والمرخي حزام
ما فيهم حميه وحثاله وزناديق

زودٍ على طبع الردى وفكرها السام
ما يطهرون الا لفرز وصناديق

تعقب هقاويهم حلم مدري اوهام
واشكيهم الله يوم ما يابس الريق

والله لو ماني على دين الاسلام
وتردّني شيمه ومبدا ومواثيق

لاخط قافٍ يقلب القوم لا اقوام
قافٍ أطيق وقاف ما والله اطيق

للي بمناصبهم رقوا دون الاقدام
وانا مكاني فوق روس الشواهيق

منظر وراي ونظرتي دوم قدام
إن غربوا وجهت انا السير تشريق

ويحرم عليها تذلني سود الايام
لاقف لها ومن دونها كني طويق

وقفة سِطر وشموخ واشوش ما دام
هاذي هي الدنيا حظوظ وتوافيق

شاعر وفكري عجز اوراق واقلام
رغم انف كل الضيق وحظوظي السيق

هذا ورغم الكم من كم الارقام
لسبد من صاحب رقم يوم ويفيق