عديت راس ابرقٍ من بين عرقيني
في حد حير العصل من ماقف ابوابي
وقمت اتذكر ابراسه وانشد العيني
يوم انعمس خاطري في راس مرقابي
ياعين وين الربوع اللي توديني
ماشوفهم لو رقيت مع املطٍ نابي
ياحيف يالابتي سقم المعاديني
متيهت بالوسامي جرد الأرقابي
نزالت القفر من بين الحفيفيني
يوم العرب تسطفق والقفر ينهابي
والناس ماهفيلهم حظ ٍ وموازيني
مير ان ربعي بهم شارتٍ اتعابي
قهارت الورد عن وجه المحيليني
الأجنبي لاعرفهم عاف الأقرابي
والضيف لاضافهم بادوه باليني
لادش بأرباعهم عن الكدر غابي
من دارهم بالموده واجه الزيني
ومن دارهم بالقشر جوله نسم دابي
احلى من الغند لاصبوه بالصيني
وامر من حنظل الكنه اليا شابي
ربعي اطوال الخطا ماهم خفيني
هوماتهم مايهومه كل كسابي
جبلان يدعابهم لو هم بعيديني
كم جمبتن صبحوها دونها اجنابي
هذا قضا مامضا جاء دورهم شيني
كلٍ بناله عشيش وحطله بابي
اميرهم عشته بين القليبيني
تشدي اشراع الجنب بأمراح عزابي
ياالله عساهم ابمنزلهم عزيزيني
من حبله منزلٍ في خاطره طابي
وانا مدام اني القا من يباريني
ابنزل البر الأصبح والله اولابي
اليا ناض برقٍ على خدٍ يشهويني
قلت اطون البيت وزونه بالطنابي
ودنيت من وارد الفرتات ستيني
من كسب اخويه ماهو من سوق الأذنابي
ماعاش جدي على المسحاه والطيني
اليا نوى الله برزقٍ جاله اسبابي
رزقي على اللي خلقني مايخليني
معطي العطايا بليا منّ واحسابي
والخاتمه ياالله انك تنصر الديني
واتمن احدود العرب من كل طلابي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر