عديت في راس رجمٍ في الخلا الخالي - ناصر الرياحي

عديت في راس رجمٍ في الخلا الخالي
وقامت هجوسي تلاعبني والاعبها

اجر صوتي واغني كل موالي
وابيات شعري على العليا مدربها

اروح النفس ارب الهم ينزالي
والنار في داخلي زادت لهايبها

لاعدت ضلعٍ رقيته يومٍ لحالي
في ديرتٍ ماعرفنا وش مذاهبها

نصبر ونصبر ولاكن صبرنا طالي
اربع سنينٍ وحنى في مناكبها

لا نامو الناس عيني دمعها سالي
من بد كل البشر ربي معذبها

انا بشروره طواني كل غربالي
وهموم في داخلي شبت شبايبها

وجدي على ديرتٍ للربع منزالي
ديرت بقومٍ تكرم من يحلبها

دار تربه ياعساها وبل همالي
ديمومتٍ ماتغيرها هبايبها

والعشب ينبت بها من عقب الامحالي
وتاخذ ثلاثين عام الخير يضربها

دار الكرم والشهامه دار الابطالي
واهل الشجاعه منول في حرايبها

انا بقمي وافتخر والراس بالعالي
وكل القبايل ونعمٍ في مناسبها

حنى هل الاوله ماناخذ التالي
والخايعه مانشدنا وين صاحبها

تاريخنا مثل نور الشمس له صالي
افعال تشهد لنا محدٍ مكذبها

ربعي هل المعرفه ماضين الافعالي
وقت الحرايب عذاب اللي يحاربها

ياللي تخم العلوم الوان واشكالي
الكلمه اللي بلا مصدر تجنبها

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر