مجري الهيّاب

لـ ، ، في المدح والافتخار، آخر تحديث :

المنسابة: مشاركتي في حفل البطل / تركي منير السمي البقمي

الله يعز الدين في دولة الدين
دوله على نهج النبي والصحابه
شعارها التوحيد نخله وسيفين
رمز الديانه والعطا والمهابه
اللي على اهل الدين تضفي الجناحين
وعلى معاديهم تشن الحرابه
صاح الكويت وجوه حالاً ملبين
ومعادي البحرين شقق ثيابه
ويوم اليمن نادا وينخى السلاطين
وقف اخو نوره نهار انتخى به
هادي يقول الحق ترى العلم علمين
الحوثي وعفاش سوو عصابه
قال ابشر بعزك وحنا حليفين
واللي يحالفنا عليهم هلابه
وامر مداغيش تدك المعادين
في ليلٍ اظلم حي منهو سرابه
تحت اسم عاصفة الحزم ياشياهين
الحرب نفتح للمشاكيل بابه
وتطلقوا سوات شهب السراحين
وخلوا دفاعات العصابه خرابه
وذاقت عصابات الخراب الامرين
وضاق الفضا والارض رغم الرحابه
وجونا على الحد الجنوبي سريعين
ولقوا دفاعات شديدة صلابه
دام الحرس والجيش في الحد صاحين
يادار لاتشكين هم وكآبه
ومن ضمن وقفات الرجال الدنادين
وقفة بطل على العدو يندعى به
وقف ابو محمد سعوط المجانين
يوم به البارود كنه سحابه
صامل ولا فكر في وحده وثنتين
في الماقف الغصاب يحسب حسابه
ونادوه ياتركي ولااوحى المنادين
وعيا عن الماقف يتم انسحابه
من طنخته وقف بوجه الملاعين
ورماه واحد والقدر قد رمابه
واستشهد الله يرحمه قولوا امين
عساه في الجنه عذي شرابه
موقف بطل سِجل بوسط الدواوين
في لوحة التشريف كلاً درى به
وبعد صلاة الفجر والناس واعين
حضّر ولد سامي وحطت ركابه
سال عن الميخار نسل الرماضين
قال نشوفه طايح في الرقابه
قال افزعو بروح اجيبه انا الحين
مابغى ولد عمي عشاً للذيابه
قالوا ترى هذي سوايا المجانين
الموت قدامك مكشر بنابه
قال اتركوني ماني بصابرٍ لين
اجيه واي شخص خوي مرحبا به
واخذ سلاحه وانطلق خاطره شين
عجلٍ بخطواته كما ليث غابه
وشافوه سيين النوايا الخبيثين
واركوا عليه النار ولاحدٍ اصابه
صوت الرصاص يثّور يسار ويمين
وامامه وخلفه يشوفه ماهابه
تسوقه النخوه وعزم الوفيين
الين جا له وحمله ثم مشى به
حول به من الظلع ياحي ذالعين
ولازال صوت الرمي يصدح خطابه
حماه رب البيت شر النيايشين
اللي على محمد منزل كتابه
وفي يوم دارت معركه في الميادين
اخذ قضى الميخار يوم المجابه
خمسه ذبحهم وانتهى وانقضى الدين
نصراً لابن عمه سقى الله ترابه
فعلٍ لابن سامي عليه المضامين
مجدٍ يخلد له من اول شبابه
يقدم نهار الهوش على المغيرين
على خطى منسي ولا به غرابه
منسي قدم للضلع والناس ممسين
ظلع الوديعه جندل اللي رقى به
فعول منسي في المعاهد من سنين
وتركي تقدم لابن عمه وجابه
ياتركي بن منير والله ونعمين
شبلٍ وولد شيخٍ ومن راس لابه
الاد سامي في المواقف شجيعين
حوض المنايا تارده ماتهابه
انتم هل الطالات في العسر واللين
عدوكم ياحسرته يا عذابه
حماية الطارف زحولٍ مسمين
بمشوك يفري نحر من سطابه
في راي شيخ راجحٍ بالموازين
كرم وحَسن اخلاق لين جنابه
ابو ذعار حمود منصى الميامين
ومزبن لمن جور الزمان التوى به
سديد راي وريّف للقريبين
شيخ تجاوز هقوة اللي هقابه
قلته وانا ربعي عزازٍ شريفين
اهل الحميا والقصيد وادابه
الا مريح سلم عرف وقوانين
هيبه سطر نخوه شجاعه ذرابه
في صف ابو محمد عسى ايامه سنين
شيخ عصابة راس للي اعتزى به
سلطان راع الجود طلق الحجاجين
حكيم راي وشامخٍ يقتدى به
وحنا البقوم اللي على المجد ضارين
ابطال والتاريخ يشهد كتابه
حنا لنا تاريخنا بالبراهين
فعلٍ يشوش راس منهو حكى به
جيوش نابليون راحت قطاعين
ثلاث غزواتٍ وراحت هبابه
ومع القبايل في المواقيف صلفين
قبل الامن في الدار يضفي حجابه
وكل القبايل في وطنا عزيزين
والنعم في خنذف ونعم بشبابه
وصلوا على من ثبت الحق والدين
اعداد ماهل المطر من سحابه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين