مبعدين المراحيل - صحن بن قويعان

عديت في رجمٍ طويلٍ يباين
أخيل نشر مبعدين المراحيل

أخيلهم لين اتقن الظعاين
يتلون جرة ذاكر العشب والسيل

أقفم وعيني في سنعهم تعاين
ينحون واثنات الجمال المحاميل

اشوف من تالي دبشهم عواين
من بعدها تسمى سوات السماليل

ماهمهم شف القلوب الحزاين
يتلون شف مراوزات المخاليل

ياصاحبي ليتك فتشت الظعاين
حتاك تدري انك عليه غرابيل

أسقيتني كاس الطنا والغباين
وانته تواعد بالليالي المقايبل

ليا قمت تضحك بالثمان الرزاين
حطيت لك بفلوج قلبي مداخيل

أودعت مني قاسي القلب لاين
وحمست كبدي حبس بن المعاميل

الكون كونك ياعطيب الكواين
والأمر للي يولج الصبح بالليل

أرقابنا حدر الموده رهاين
وأعتاقها بيدين من يعتق الميل

© 2023 - موقع الشعر