يابنت جاك العلم علم قحطاني

يابنت جاك العلم علم قحطاني
علمً قدح من راس شب الفتيله

اخذي كلام الشاعر المقرحاني
وجوزي كلام متبعين الفشيله

اوجيهنا فيها الحيا من زماني
وارقابنا للرب تخضع ذليله

افعولنا تشبه سهيل اليماني
وايديننا في المد ماهي بخيله

مانمشي دروب الردى والهواني
نشوم عن درب الخنا والرذيله

فينا على طيب الفعل عنفواني
ولا نسمع هروج الطفل والحليله

يابنت ماامشي طريق الطماني
لاني ولد من هو مزبّن دخيله

شيخً على درب الكرم والتفاني
ركنً عظيمً من ركون القبيله

ابوي شيخً في العرب مايهاني
ستر الهنوف الحاكمه والطويله

قرمً عطاه الله عزم الحصاني
رجله تدوس الكايدات المهيله

فعله عن فعول النشامى كفاني
فعلاً دوى لاهل الكبود العليله

ضيفه يشوف السامح المرحباني
يسمع لقول المرحبا لو يجي له

والعود والوجه الرحب والصواني
والبن الاشقر فالدلال الجليله

هذي فعول ابوي اول وثاني
شيال حمل ومرتكي للثقيله

وانا ترا شخصً وسيع البطاني
ما همني هرج العميل وعميله

كم واحد وده يكون بمكاني
لكن يبطي لو تجيبه وسيله

ولانيب لا مادح ولاني اناني
اسكت ليا سويت لاحدً جميله

ولا جيت ابصعد للقمم ما اعاني
يوم ان غيري شافها مستحيله

شاعر واميز في البيوت السماني
يوم ان غيري في الشعر ياحليله

اتعب على الحبكه ونضج المعاني
وبيت بلا معنى .. اسوي بديله

والشعر ما يبغى ترى ترجماني
احرص على بيوت القصيد الجزيله

والشعر وزن وقاف ياليل داني
ماهي خثاريق الخليل لخليله

وياللي تمدح في قصيد الاغاني
حنا عسانا نبلع اشعار شيله

كم شيلهً لو تنسمع في ثواني
دريت بان الشعر مهدود حيله

ماحب اكثر في الحكى ياخواني
وخايف اطول ثم اجيب الهزيله

اشكر جميع اللي يصيغ الاذاني
شكراً عميق ولا يجي فيه ميله

واختم بما قلته انا من لساني
واثني صلاتي عد وبل المخيله

على رسولاً الحق مرفوع شاني
وضح لنا الدين الحنيف بدليله

الشاعر مسعود القحطاني