مرثية (خالي راشد)

الله كتب هالفاجعه والمطمّه
والحمد للمولى على كلّ حالي

قلبي بكى من ثقْل همّه وغمّه
واقسى البكا لا صار .. لفْراق غالي

راح الحبيب اللي يساوي له (أمّه)
مرحوم يا فخر الرجاجيل .. خالي .. !!

راح وْ ترك للناس حسْنات جمّه
للناس يُذكر في حميد الخصالي

لا من حكى .. لا بدّ قوله يتمّه
يوفي ولو جارت عليه الليالي

ولا من عطى .. يعطي ولو كلّ دمّه
الطيب قد نصّبْه شيخ الرجالي .. !!

قد كان هو للطيب خاله وعمّه
قد كان هو للطيب يا ناس والي

في ذمّتي .. شفت الصغيّر يلمّه
كنّه يعدّه واحد مْن العيالي

يحسن لكل الناس ويْبرّ فامّه
يا كثْر حسْناته وفي كلْ مجالي

شيخ ٍ يعَسْف المعضلات المهمّه
المرّ لا ذاقه يسمّيه حالي

يا شعْر ما توفي ولو فيك ذمّه
تعجز توصّف طيّب الذكْر .. خالي

يالله عسى الفردوس دار ٍ تضمّه
واغفر ذنوبه يا عظيم الجلالي .. !!