ما شفت خالي

ما شفت خالي غير من يشتكي عوقه
وسيبوه قلبٍ في الهوى ماله اعلاقه

لا واشقا من حطّم الصبر معلوقه
على فقد خلٍّ صار لي شوفه اشفاقه

لي من ذكرته دمعيه هلذ من موقه
والنفس في وصله من البعد مشتاقه

الغالي اللّي صنعته هوب ملفوقه
اشهد اللّي سوّاه صاغه على فاقه

خذ م الوضيحي شبحة العين وعنوقه
عينٍ خطيره للعشاشيق سرّاقه

يكسيه منشولٍ حظاياه مطلوقه
على ينوبٍ كنّها لمع برّاقه

حجيه لطيف ويسحر العقل منطوقه
وزينٍ سلوكه في معانيه واخلاقه

خلّ هويته يختلف في الهوى ذوقه
لهل الطّرب والغيّ في شوفه اعشاقه

خذني وخيذ القوم وقفا وانا توقه
وانا على ردود السّلب ماليه طاقه

مثل الذي عقب الهمل حوّشو نوقه
ترقى الطّعوس دونها ضرب تفّاقه

ونذيت ونّة لي من الذود مفروقه
يوم اسلبوها غاليٍ يصعب فراقه

أحسّ كبدي من تجافيه مسروقه
وش عاد لو شلّو مع القلب معلاقه

اشكي وشكوايه من اللاش مرفوقه
غير الذي عن شيمته عندي اوثاقه

يرجع طليب الثار لي ياه بحقوقه
راضي وكلّ عندهم يكسب ارزاقه