ذا بلا علتي

نفسي اللي على ما اشوف متلوفة
ما تطيع الهروج وكل عذالي

قومها اللي يشيل الثوب بردوفه
واحد العصر عندي ما له امثالي

بس اشوفه ونفسي عنه مشفوفة
وان بغيت المواجه ما تهيالي

عمز ريم تقود الصيد وخشوفه
ما تحب الطمان وتتبع العالي

عود موز يهز الريح بطروفه
كل ما جاه ذعذاع الهوا مالي

يوم أنا أحب خلي واتبع اشفوفه
والردى فيه ما يطري على بالي

شايف فيه شي محد ايشوفه
ذا بلا علتي وأسباب غربالي

كن بعيونها شيخ ركز نوفه
تتبعه سربة والفين خيالي

حاكم يامر العربان بسيوفه
مقتفيه جموع ما لها تالي

والجدايل على الأمتان مضفوفة
ذيل شقرا ذعرها الصوت مشوالي

لو يحاكيه راع الصنف ويشوفه
قال هذي غريزة جيلنا التالي

يا حسين النبا يا ناقش كفوفه
انت غربال حالي يا بعد حالي

أنت مثلك يشوف الحال ويروفه
لا تجي ظالم للناس قتالي