يا بو سعد يا شوق ضافي الجديلة
ياللي خويك دايم ما تمله
تبي تحاولني تجيني بحيلة
مثل الذي ينشد يبي حاجتله
ذكرتني هاك الليالي الجميلة
يوم القنص والطير ينقل بحله
وأنا على المعتاد نفسي عليلة
فالطير والمقناص كبدي مغله
وسهيل باقي له ليال قليلة
وعقبه يبيّن في براده وظله
القيظ راح وقام يطوي صميله
شهر شعبان يكمّل القيظ كله
الطير والمقناص يا حبني له
يا بو سعد محلاه في موسم له
يا بو سعد نواف دوّر بديله
فرخ يحالي ريشته ريشتله
مثله وجله والموامي طويلة
من بر فارس ماكره ماكر له
ابيض حمر جثل افخوذه جليله
صدره عريض وهامته مستجله
افجح قصير الحجل ضاف شليله
دق النعيري فيه مثل الاهله
تخور في وسط الطيور وتجيله
ايحيّر الصقار في مفرعله
بعيد الطلوع اللي يصيد الجليلة
كثر الحباري شوفهن ما يذله
أبى اليا وقت الطويلة تشيله
والصيد لاوذ والطيور ازهبله
شقر قرانيس اكبار مزيلة
كل يبي يطلع على عادتله
لامير يرمز مثل مثل قبع الفتيلة
يفوع منك بساع سبقه يتله
امّا علق والا غدالك دليله
ينومس الصقار في هدتله
مع ضف ربع يكسبون النفيلة
ربع احشام وشوفهم ما تمله
عذروبهم ليقلت فيهم وسيلة
يدرون زلات الخوي حشمتله
وتمت بذكر الله منشي المخيله
اللي عبيده كلبوهم بطله
وصلوا على المختار راعى الفضيلة
نبينا المعصوم عن كل زله

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين