عين عاشور - سمير بن صليهم

القلب من كثر الهواجيس مشتان
وأنا على المقناص والطير مجبور

اذكر ليالي الحصم وابن ثنيان
وأبو حمد والعتل وأيام زنفور

والشايجي هو وأبو راشد قهيدان
وكل عساه بنية الخير مذكور

ربع احشام وخوة ما لها اثمان
خويهم دايم على طول مسرور

معهم قنصنا ديرة الشيخ سلمان
وشفنا الشطوط اللي تحت شمّخ القور

وصدنا بعد فيها حباري وغزلان
والطير هديناه وإبليس مدحور

بقفريّة ما طبها قبلنا إنسان
كل أرضها من بكري الوسم ممطور

فيها أم سالم تزعج الصوت بالحان
تونس هوى الغربي على شقة النور

ريحة نفلها ريح مسك وريحان
متخالط فيها نواوير وازهور

يا ماحلا المقناص فيها اليا زان
وهدت اسبوق الطير من راس عنقور

خطو اشقر مجناه من راس حوران
فرخ على هبر الدواغير ممرور

امسرول من كثرة الريش عريان
حجلة قصيرة ومفرع الراس مزبور

اشقر عريض الصدر ملموم جنحان
ضافي الشليل أمودّع الريش فاعور

كنه اليا شفته على الوكر سلطان
وسط الطيور يقال له عين عاشور

متعلم لمجابهة كل حفان
جزام من كثر النواميس مسعور

راعيه ما طاوع مكثرة الأثمان
طير الحباري لا برق الريش مذخور

هدت اسبوقه في نشانيش وديان
تسوى لها عندي ملايين وكرور

في موسم راع الولع فيه طربان
الصيد واجد واشقر الريش له دور

واليوم وقتك قيظ والطير منهان
شمس ولواهيب ومعاصير وحرور

سبحان من عنده تصاريف الأزمان
هو الذي يامر ولا هو ابمامور

© 2024 - موقع الشعر