على ضفاف البحر - محمد بن ديجم بالحارث

على ضفاف البحر والكورنيش
امشي ولا ابغي الفت الانظار

مشاعري بين العقل والطّيش
كنها في حالة ذعر واستنفار !!

والفكر ممّا فيه من تشويش
ما تنكشف سرعته للرّادار

جوّ الخبر بارد ولا ادري ليش
تغيّر وقدني احسّه حار ؟

ياللّي مزاجي صار ملك يديش
بعدش تعالي شوفي اللّي صار

لش طيف كنّه نقطة التّفتيش
القاه قدّامي وباستمرار ..

ومن الوله آخايله وادعيش
واثره خيالٍ تنسجه الافكار

محتاج للنّسيان والتّطنيش
اخاف من بعد الصّبر انهار

لا عيّت الاقدار كيف نعيش
مع بعضنا لا عيّت الاقدار

خلّيني لغيرش ، وباخلّيش
للغير والماضي لنا تذكار ..

نبقى غلابا لاقوا التّهميش
تروي بقايا عشقهم الاشعار

© 2024 - موقع الشعر