اليوم قل الصيد

يا بو سعد لو جبت من كل الألوان
أنا خلصت من الطيور وشقاها

ما لي بها يوم القنص موسمه شان
والصيد قل وقل عندي حلاها

ماهوب كره لأشقر الريش لا كان
أيام حزاته عطتنا قفاها

يا شرينا من طيور لها اثمان
وياما عرفنا طيبها من رداها

وياما قنصنا ديرة الشيخ سلمان
وياما تعدينا شمال وراها

وشفنا شطوط بين بدره وجصان
بظل الهضاب اللي بعيد مداها

وصدنا بعد فيها حباري وغزلان
والنفس بالمقناص لحقت امناها

بأرض خلا ما جاه بدو وشيوان
قفر تساقيه الشمال بهواها

وسميّة فيها حروف وريضان
تلعب بها الورقا وتزعج غناها

ودجنا بها يوم اشقر الريش له شان
وصدنا بها من كل صيد رعاها

أبو حمد وفهيد وابن ثنيان
وانته وأنا والشايجي كد وطاها

غدالنا فيها اشقح الريم نيشان
واطيورنا هدّت وصادت عشاها

صدنا وعلّمنا الوحش والطرب زان
بقفرية دلو الاحيمر سقاها

ريحة نفلها ريح مسك وريحان
ليذعذع الغربي بصفوة سماها

ملامح مرّتك في ماضي الأزمان
أظن قلبك لو نسى ما نساها

واليوم قل الصيد في كل الأوطان
زوّد على قل الطيور وغلاها

آخر زمان وناقل الطير تعبان
يبحث خفاه وصيدته ما لقاها