سحرٍ حديثه

شفناه يوم وراح ما عاد شفناه
زول وحش ما زارنا كود مره

مدري غريب جايباته مطاياه
والا قريب الدار عندي مقره

شفته ضحى ما شفت فالبيض حلياه
وصايفه فيها حياة ومضره

عبثٍ بمنطوقه قريب بمعناه
شبحه اخلافه والنحر ما يزره

توه ابعج صباه يمرح بدنياه
قلبه خضر ما جاه شيٍ يفره

سحر حديثه صامل العلم يقراه
حتى الرموز الخافية ما تغره

ليشافه العاشق نقل داه برداه
تصورت دنياه حلوه ومره

زملوق غارٍ عله السيل وأطغاه
دايم مراوح السحايب تمره

راع الهوى ليشاف مثله تمناه
ملزوم قلبه للمودة يجره

أدعج غنج متخالط داه ودواه
ما بين سرجوف وما بين غره

ذكّر على اصباه وقت فقدناه
غريت من صافي حليبه ودره

قلته وأنا مالي مع البيض مشهاه
وسلم الهوى مالي بطرده مسره

أنا حذفته حذفة مقيط لرشاه
وهو كفاني كل خيره وشره

والعود لا قفّا شبابه وخلاه
ما عاد ينفع فيه زاد يبره