سحر البيان ..

لـ محمد جفال، ، في غير مصنف، 887، آخر تحديث

سحر البيان .. - محمد جفال

الشعر سحر البيان ولذةالسامعين
الشعرصوت المشاعروانفعالاتها

الشعرصوت القلوب الي ذبحها الحنين
ان كان بعض الحناجر غابت اصواتها

الشعرحاله تجي مع طيحت الدمعتين
عند ابتهاج الخواطر وانكساراتها

الشعر أحاسيس ناس نصفهم راحلين
نقلِّب قلوبها ونشوف نياتها

الشعر ديوان فيه نقابل الاولين
لو انها في قبورٍ يوحش اسكاتها

الشعر هيبه تزلزل وقفة المعتدين
اقسى من اللي تفجّ الصدر طعناتها

والشاعراليا قصر شعره عن الوالدين
يعني عقوق المشاعر وانعكاساتها

وانا مدين وعجزت اوفي ديون الثنْين
لايابعد زهرة الدنيا وضحكاتها

ابعد عن الناس بعيوني من الفرقدين
وعلاقه اكبر من الناس وعلاقاتها

وحنا ركضنا وتعّبنا غبار السنين
والنفس كثرت حسانيها وسياتها

مدري هو الوقت خلانا كذا غافلين !
ولا ظروف الليالي هذي سواتها

واليوم حنا بحاجة دعوة الوالدين
تقتل ثعابين غفلتنا وحياتها

ونحتاج دعوة مريض ..ودعوة مسافرين
تلحق بعدها النفوس الصلف غاياتها

على ركايب يبادلها الرغى والحنين
ماهو على اللي تولع نور لمباتها

ونحتاج مسحه على راس الصغير الحزين
اللي فقد ضحكة امه وابتساماتها

ونحتاج ركعة وثلثين العرب نايمين
في حزة تسمع الساعة ودقاتها

هذا علاج القلوب وكل خافي يبين
حياة الانسان تكشفها محطاتها

© 2023 - موقع الشعر