يامرحبا بالطير. لـ سمير بن صليهم

يامرحبا بالطير - سمير بن صليهم

يا مرحبا بالطير واللي عطانيه
في ساعة جابه وأنا له شفاوي

سيد الحرار اللي طوال مواميه
حر جليل وفارسي نداوي

ابيض حمر سبحان رب أمسويه
ايونسك ليجيت جو خلاوي

أبو مبارك قال قول وفا فيه
الله يفكه من كبار البلاوي

ما قال ابا ابيعه وادور الثمن فيه
في ساعة والطير سعره غلاوي

ما همه الدنيا وقلّت مشاحيه
حامى على قوله بعيد الهقاوي

صحيح من قال المثل في معانيه
سلك الحرير ولا جديد الحساوي

في طيّب الحسنى عسى الله يجازيه
جعله بخير وكل يوم غناوي

مطلق عجب عينك الياجيت ناصيه
سهل الجناب وبالسلوم امعناوي

من لابة بوش المعادي تفاجيه
ليجا نهار فيه صك العزاوي

حريبهم صكات بقعا اتلاقيه
من صنع فعل امطوعت كل قاوي

ربعي اسنادي موسم الطيب تشريه
ريف الضيوف ومحرقين القهاوي

الحي جعل الله يمده ويعطيه
والميت جعله في الجنان متساوي

وتمت بذكر اللي هل الدين ترجيه
رب له العبد المصلي رجاوي

تعليقات الزوار

كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
للتواصل مع ادارة موقع الشعر إضغط هنا.