يامرحبا ياهل الخصال الحميدة

لـ نافع الحربي، ، في غير مُحدد، 1،075، آخر تحديث

يامرحبا ياهل الخصال الحميدة - نافع الحربي

يا مرحبا يأهل الخصال الحميدة
ترحيبةٍ من وافيات التراحيب

تحيةٍ بالمفردات الجديدة
تمسي على طيبٍ وتصبح على طيب

الملتقى الثالث لبس ثوب عيده
انتم نجاحه والفرح والمكاسيب

بحضوركم يكمل لنا مانريده
لنا وعلينا في لقاكم مواجيب

إن ما صخرنا للظروف العنيدة
رايٍ ليدينا في حباله مقاضيب

غدابنا وقتٍ طوانا بعيده
وحنا منوّل روس قومٍ مذاريب

المجتمع كنز المحبة رصيده
ورجلٍ بلا ربعٍ زمانه عواقيب

حنا اليا قر الوكاد بوكيده
عيال مروان المسمى اهل الطيب

ننطح عواصيف الأمور المكيدة
نضرب على الراي الرهاوي اليا هيب

مجد الجدود اللي تقدّم نزيده
مجدٍ يسجل في جديد المكاتيب

بديدةٍ ياحي والله بديدة
عالي نسبها ماوطتها العذاريب

تاريخهم يصعب عليّ اتعديده
صبحٍ جلا ليلٍ سواده غياهيب

رجالهم فن الشجاعة يجيده
عن واجبه بين المناعير مايغيب

يما احتمينا بالسنين المديدة
يوم الليالي بين أهلها شلاهيب

عفرٍ كما متون الرواسي امشيدة
وضحٍ اتعلّق في اذراها الدباديب

ويما وقفنا بالفعول الرشيدة
وقفت شرف مع حرب ماهي تكاذيب

بشعرٍ يصوّت بالمعاني نشيده
وجاهٍ وراي ومال وعرفٍ وترتيب

يما ارتفع للمجد منا وليدة
يشهد على طيبه شيوخ الاجانيب

ربعك اليا طقّت حديدة حديدة
يغني ذراهم عن بعيد المعازيب

كنك براس اللي تراكم جليده
مشمرخٍ ثلجه من الشمس ماذيب

هلابكم والقول يكفي سديده
يكفي مصيبه عن كثيره اليا صيب

في دار وافين الفعول المجيدة
دار السعود مطوّعين الاصاعيب

كم شاعرٍ فيها يشوقه قصيده
في كل مطروقٍ جميل الهناديب

ما حقنا فيها القسوم الزهيدة
يوم ان كلن يقتلب كنه الذيب

نفرض صليب الراي من روس غيده
نفتل وننقض مبرمات اللواليب

كم جيش قومٍ طاح منا عقيده
عيون جموعه مثل قدح المشاهيب

وكم داهية حربٍ قطعنا وريده
ترمي جواده في نحرها المعاطيب

ويما ملكنا المكرمات التليدة
معرّباتٍ طيّبات المناسيب

جف القلم بالواردات الأكيدة
وأزريت لاحصي عد شمٍ مراقيب

تمت بمضمون الحروف المفيدة
في مدح ربعي متعبين المناجيب

شعر : نافع مطر المرواني

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر