حسبي الله - أحمد العولقي

كل دمعه تكب من عيني قهر
بكره تبكي وضعف دمعي تسكبين

يوم من كاس المفارق والهجر
اللي شربته منك اشوفك تشربين

جيت لك كلي تناهيد وعبر
وقلتي بتداوي جروحي وتعتنين

في فؤادي اللي تأذى وانقهر
واثرك انتي ما عرفتي تجبرين

قد كسرتي ضلعي والقلب انكسر
ولا لكسري جبر مير الله يعين

جيت لك فارش لك الدنيا زهر
ازعل الدنيا واشوفك تضحكين

جيت لك مفتون قلت انتي عمر
وقلت انتي اللي لها قلبي يلين

واعتزلت بجيّتك كل البشر
وكل أحبابي ورفاقي المخلصين

إعتنقت الليل وادمنت السهر
كله لاجلك لما كنتي تسهرين

أحسبك لاجلي سهرتي للفجر
وانتي غيري في حياتك تملكين

اي قلبٍ تملكينه بالصدر؟
اي روحٍ فيك ليه ما تجاوبين؟

ما حسبت الوقت وميعاد الصفر
ولا دريت انك بقلبي بتغدرين

بس طعنتيني بأعماق الظهر
وسال قلبي في ديار المسلمين

لا أحل الله من خان وغدر
ولا رحم منهو تسلّى بي سنين

وحسبي الله كل ما حلّ الفجر
وكل ما تسجد جباه الساجدين

© 2024 - موقع الشعر