ياعصافير مدري وين اروح اشتكيه
صاحب قبل اعرفه كان حالي تمام

ياعصافير احبه (حسبي الله عليه)
لاتركني انام ولاتركني ونام

آه ياني تعبت من السهر احتريه
كل ماهتّزّ كتفي فزّ جفني وقام

ياعصافير والله اني اموت فيه
فوضوي مرتّب بعثره بانتظام

اعتذر منه وارضا من الزعل قبل اجيه
ويحضننه عيوني قبل اقول السلام

صدقيني بغيت البارح ازعل عليه
بس كنه وحشني وصار فيها كلام

ياعصافير حتى دفتري يشتهيه
كن بينه وبين الشعر حالة هيام

كل سطر يتمنى اكتب اسمه (عليه)
وكل صفحه تهندم للقلم باحترام

ياعصافير واللي بالسما نرتجيه
انها عيطموس من رجال عظام

بنت شيخ تخاف الشمس تشبه يديه
لاشرق نور كفه طاح حيل الظلام

يخجل الشعر فيني منه قبل ابتديه
والحروف تّعّذر عن حروفه صيام

ياعصافير مثلي لاسكت اعذريه
دام مني قصيدي لاجزع مايلام

يدري اني ابيه ولاابيه وابيه
وهو يبيني وبيني وبينه الليل حام

ياعصافير مدري لاتقولين ليه؟
(السلام عليكم وعليك السلام)


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر