حب ومذمة

آه من حبٍ عصاني.. في فؤادي مرتعه
جيت أذمه في قصيدي شفت مدحي يشكره

جيت له طيبة وحيلة .. ياما حاولت اخدعه
ويوم أبي أهزم غرامه أنتصر له وانصره

جيت شدة .. جبت ليني لا و لا ذاك أقنعه
قلب صادق في المحبة والزمن ما غيّره

إن نويت الصد صدّت عيني .. واذني تسمعه
والصعب لا جيت أبنسى أنسى نفسي واذكره

وإن بغيت انثر غرامه انتثر له واجمعه
وأن تجمّعت أجتمع له.. واجمعه قبل انثره

وان قصدت أعصيه طعته وان عصاني اتبعه
وان خطيت ارضته روحي وان خطى هي تعذره

لو عذولي به عذلني ما أطيعه وامنعه
لو غرامه كان زله بسأل الله.. المغفرة

كل هالعالم بعيني ما يجي ظفر اصبعه
كنّه لحاله بكوني ... باوله وبآخره

حبه بدفوة ضلوعي نام واسْهرني معه
وان غفت روحي بحبّه عين قلبي تسهره