حب عشرة حب مية - آمال محمود كحيل

حب عشرة حب مية
بقلم
آمال محمود كحيل
 
موش هالومك ، أو أحاسبك
لو في يوم جه خانني قلبك
ولا حبيت حد تاني
ليه أكون وياك أناني
أو أطالبك توفي وعدك
 
حب عشرة ، حب مية
الحكاية ماهيش قضية
طول ما قادر تبقى عاشق
يبقى خليك سهم راشق
واوعى ترحم قلب حبك
 
الطبيعي تخون وتغدر
مين على الإخلاص بيقدر
مين بيرفض عطر وردة ؟
ولا نظرة ف عين بتنده
يبقى ليه هازعل واعاتبك
 
موش هاقولك إيه حكايتي
ياللي كنت ف يوم مرايتي
قوللي إيه فايدة صراحتي
ولا فاكر هالقى راحتي
لو هاقول الذنب ذنبك
 
بس نفسي تحس مرة
إن جوه القلب حسرة
وان فشلت ف يوم أكونلك
كل شيء ، أو حتى ضلك
سيبني ذكرى ، جوه قلبك
 
وافتكر لو لحظة جرحي
اللي داب في أنينه فرحي
وان حبي لك حقيقة
موش هايفتر لو دقيقة
مهما قلبي عانى صدك
 
بادعي ربي وقلبي صافي
يوم تقابل حضن دافي
تطفي وياه نار حنينك
تنسى وياه شوق سنينك
واللي كان ليك إنت وحدك
واللي كان ليك
إنت وحدك
© 2024 - موقع الشعر