عشرة شروط - مرزوق الثبيتي

خابرك تبيني وأنا مثلك أبيك
من بعد ما دار الزمان ولقيتك

يا صاحبي ما عاد لي رغبة فيك
أبيك تنساني مثل ما نسيتك

وان كان ودك في مواصل محاكيك
اجل بلاش اللفلفة لا بكيتك

عشرة شروط إن كان تبغاني أجيك
حتى يعود قلب مغليك بيتك

أبيك ترضيني وتترك تغليك
وأبيك تعطيني مثل ما عطيتك

وأبيك تفرح بي ليا جيت ناصيك
يعني تفز وتنتهض لا نصيتك

وأبيك تنسى كل من كان شاريك
مادام أنا بدموع عيني شريتك

وأبيك تعرف قدرك بقلب مغليك
وأبيك قد الهقوه اللي هقيتك

وأبيك تتنازل وتترك تحديك
وأبيك خطن لا كتبتك قريتك

وأبيك تنسيني دروب التهاليك
يا دربي اللي تهت فيك ومشيتك

هذي شروطي كان تبغاني اجيك
هذا بعد يا صاحبي كان جيتك

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر