طلوع هلال

مايجرحني الا اللي يقولون كيف الحال
وانا كيف ابشرح نار ف الصدر موقوده

تمر السنين و هي كما جرة الزلزال
على عمقها ف الارض بالحس مرصوده

لو ان الاماني باقيه والليال طوال
اقول انها تبقى ولاهي ب مفقوده

ولكنها ماهي ل اهلها طويلة بال
على أيامها العجلات ماهي ب محموده

تمسّكت في صبر الموده عن الاهمال
وانا في ضميري حاجه اثقل من السوده

تهون الرقاب الحمر عن دمعة الرجال
دموعي عزيزه وانتي أعز موجوده

أشبهك في فرحة بداية شهر شوال
ب اهلها وحلواها وفي نفحة العوده

لواحظك قهوة خافقي بالنظر فنجال
وعن سلة المجرود ما انتي ب منشوده

عليه اللثام ابو نفانف وابو خلخال
تحت لفته بانت خزاماه و وروده

ثمانك ليا منك ضحكتي طلوع هلال
ومن بعده الايام ماهي ب معدوده

على عنقك السلسال ومزيّن السلسال
لو انه على غيرك يبى يفرق ب زوده

تشيل المفاتن فوق خصرٍ ثلاث قفال
وشاطيك يا نصف القمر ما اعرف حدوده

كثيرة حلا غضة جسد جوهرية حال
أشك انها في جنة الخلد مولوده