شرط قلبي - وهاج السلمي

قلت اظن وقال واحد كنت اظن وخاب ظني
واختلف عندي مقاس الظن في عين التجارب
 
لاتقدم ظن عقلك والخبر ف العلم سني
الصحابه ما احكموا ب العقل في مسح الجوارب
 
يمكن انك ما انت فاهم ويش اقول ويمكن اني
لأجل اوضح لك معانيها معي فيها مأرب
 
اخفي المقصود عنك وتخفي المقصود عني
واعلمه علم اليقين بعكس من سدد وقارب
 
زادت الضيقه عليّ وقلت ابهوجس واغني
والله اني في طريق العشق والفرقى محارب
 
يا مراسيل الهوى الشرقي ترا الشرهات مني
تعرف المقصود لو ارسل بها ل اهل المغارب
 
الهوى له جيش قايد سطوته عفريت جني
وله على صدري سهوم وله على كبدي مضارب
 
يا ضميري لا تعاتب والغلا رمحه مطني
لو نحارب في جيوش الشوق مدري من نحارب
 
ما دريت اني شعمت النار لين احرقت بني
و صرت امنّي شوف عيني في قمر من عصر غارب
 
اثرها نظرة غلا مرت عجل في صغر سني
واكبرت وانا كبرت ونبت لي لحيه وشارب
 
كنت اقول اللي لمحهن ناظري مايعجبني
وكنت اقول اني بعيد الشوق واثر القلب قارب
 
يا جميله في نهار العيد من دمي تحني
اقطعي عرق الوريد اللي بدون اسباب هارب
 
وان رجعتي شرط قلبي قبل تحقيق التمني
اتركي عنك التغلي واحتوي غارب ب غارب

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر