عودك الميّاس

نثرت الغلا من دم قلبي على القرطاس
لأجل واقعٍ ما يوفي الحبر واقلامه

عفيفة هوى المشتاق للوصل وين الناس
وانا اذكرك دايم حزة الوصل عزامه

سلامات وش هذا الهجر والعنا والباس
عبس وجه وصلك بعد فرحة تبسامه

انا جيت اسلم والموده لها مقياس
وسلم العرب ما يحقر الضيف واكرامه

ابجس نبض الشوق مع طارف النسناس
وابحكم على قدر الغلا ماضي اعوامه

وسلام المحبه رده يكون بالاحساس
عليك الغرام ولذة الشوق واحلامه

لو ان المواجه صار يحكم عليه الياس
انا عاشقٍ ما يحكم الياس قدامه

تعالي وقلب وقلب ما هي ب راس وراس
هنا الوضع ما يحتاج تعصيبة عمامه

عيون المها غارت من عيونك النعاس
وعنقك من الخنصر ليا عالي ابهامه

وهج نور وجهك ما نقص والخدود الماس
ونور القمر ينقص ولا تكمل ايامه

خمر مبسمك طاغي على صوتك الهماس
اذوق الخمر والا اسمع الصوت وانغامه

نبت فوق صدرك وردتينٍ عليها اقواس
وفي كل عام يزود القوس ف احجامه

ومن قاعة الفنجال خصرك عليه قياس
واخاف الهوى من لينه يكسر عظامه

غطاك الحلا لين احتوى عودك المياس
ولا انتي ب حاجة خالك وحاجة الشامه

تزين بها اللي ناقصٍ زينها لا باس
لكن انتي يقولون عن زينك قيااااامه

احبك واماري في محبتك كل الناس
كثر ما يحبون الجماهير خزامه