مداعبه قبل طلوع سهيل موجهه/الشاعر سعود بن سعد الحافي - منصور الوذين المري

ياسعود انا ياخوك بالعون مجهود
ودواك انا مبغيه لوهو علاجي

ياسعود خوذ دواك لو بالخفا زود
ودواك سبَب علتي وانزعاجي

ياسعود لو ادري الشفا فيه ماكود
خذته وانا واثق الا الانفراجي

لاكن انا ياخوك عوقي له فنود
لو طلت واحد من يجيب البواجي

ياسعود دامك باخس جعلك تفود
بدل ادواك اكفيت شر العواجي

ادواي انا ياسعود ماهو بمجحود
ومداخله حب العيون الدعاجي

لاحصل الانسان نبنوب ملهود
ريحه نفل والهرج مابه سماجي

معها ملال الدر والمال مسنود
والموتر اللي ماخذه للزراجي

لامن وجدت اللي ذكرناه ياسعود
والله ماغبط اللي يكد الخراجي

ثم العوض ياسعود مادمت موجود
ارقب سهيل بطلعته الانفراجي

ان قدر الله دامني اونس النود
لاسير بخدٍ نوب مابه مداجي

نعتاض في المصياف ومقابل الخود
شوف البراري ونوب مابه زعاجي

في قافر سيله هماليل ورعود
ماداج به راعي الدبش والنعاجي

وسجه مع الاخوان في طارف الذود
وفنجال ماسوته ميري وراجي

هاذي طراة والروح والعمر محدود
فيها اتكيف ويتعدل مزاجي

© 2024 - موقع الشعر