دمي على حنّاك

بغيت اروي عطش عمق الحنين ولاهقيت اضماك
اثر ماعاد باقي للروى من منهلك ساقي

جذوع الصدر كانت يانعه يوم الوفاء مبداك
وذبّلها جفافك والخريف يكمل الباقي

هزيمك يا رعود الصيف سرت سمع من يهواك
تذكرني وعودٍ بالوصال ولاني ب هاقي

على هذا الطريق اول خطاك ولا حسبت اخطاك
يعديها الغلا لو انها تستنفر اخلاقي

تصافحني يمينك واختلط دمي على حناك
ولا يمحى لأنه مايباع ب عرض الاسواقي

يبي يبقى علامه فارقه مطبوعه ب يمناك
على تلويحتك بين الظلام وبين الاشراقي

انا ذاك الصبور اللي ماطاحت دمعته لولاك
وانا اللي ماحسبت ان الغرام يكشّف اوراقي

الومك يا خفوقي لين عقلي يفقد الادراك
لكن الفكر ما بينه وبين عقولنا واقي

تمشى في رفوف الذاكره بسلاحك الفتاك
مدام ان السوالف في خيالك سبحة عراقي

انا بنساه وانسى الذكريات ليا قدرت انساك
هنا نوصل لحل مصالحة فكري وخفاقي