البارحه كثرت عليّ الهواجيس
وجتني علوم مزونها المستهلّه
شرقي من الديره ركايم مداميس
في مرتع ٍ كل ٍ يجيه ويدلّه
جتهم من المنشى ترادف مقابيس
وماضة ٍ رزامة ٍ مسفهلّه
امن الرعن إليا عروق الطعاميس
الغيث ضافي والبشاير يهله
أبي الفضا وأطرد جميع الوساويس
بسجه توسع خاطري واتدلّه
امن الزمن بالصدر عقد ولواسيس
وعلاجها في عارض الدو قلّه
يم الفلاة امرفضة ضمّر العيس
ياروّحت دقّه تقلد بجلّه
بارض جمعت نبتٍ وطيب وتضاريس
بفجوجها العيرات مثل الاهلّه
علط الرقاب وفارعات النسانيس
عراض الجنوب مجملات الاجلّه
كبار الفقار مكحلات ٍمعابيس
‎منايح بزين المثايل نجلّه
يا ربعت في مرتع ٍ مابعد ديس
تزين خطّرها وتهنى بمحله
لشوفه يجاب النادرات المحابيس
‎ويجلى عن القلب الشقي ضيقةٍ له
الجمس متولم لطوي المراويس
امجهز وكثر العزب ضاري ٍ له
في كل ديره له علوم ومداويس
‎واليا طرى لي بكل فج ٍ اتله
نتوشع دروب الوعر والمضاريس
ونسبح مع عروق النفود المطله
ياما سرينا بالليال الخراميس
‎قطع الخرايم عادة ٍ مانزله
وياما رقينا نابيات ٍمخاريس
‎ناطا خطرها ولاحتزمنا نصله
بأرض ٍتدوجه مبعدات المراميس
‎أبطيت عنها وطاري ٍسجة ٍ له
كفخت له ساري بليل الغطاليس
‎شفق ٍ على شوف الحيا واستدله
وقمت اتطرى مع هبوب النسانيس
رجل ٍ وطت به جعلها بألف حله
شبيت به ناري وحولي عواسيس
دون الغضا في لبة ٍ مستظله
واصليت برّيه بزين المحاميس
‎لين اندهم لونه وفاطن ٍ له
وادنيت لي صفر العناق المقاويس
‎ودنيت نجر الكيف والكيف دله
هيل ٍ اغذاها وزعفران ٍ بتقييس
‎فنجالها يجلي عن الكبد عله
كيف ٍ لنا وكيف الرجال المعاميس
‎وإكرامها ما نذخره أو نكله
في خوة اللي معتلين النواميس
نقضي ليالي بالخلا ما نمله
هل السموت مشرعين المجاليس
‎زحول الرجال اللي يشرف محله
طيب وكرم ونفوس مابه نواديس
وقبال حلو بلا تصنّع جبله
وإن عودت للفعل ماهم مفاليس
‎أدناهم اللي باللوازم نسله
مامنّهم هيس ٍأو ربوّه لهيس
ولاهو قصور ٍفي هل الطيب كله
وقفاتهم وقت العزاوي متاريس
وأفعالهم ماتنحصي لو نفله
وأبعد عن الخايب ومشي الدنافيس
وأعراض خلق الله تورث مذله
واللي يخاوي له رخوم ٍ هتاريس
ماذاق طعم العز وأردى سجله
واللي يجون بنصح ودوني دواسيس
مشي ٍ بلا جايز فلا هو بمله
واللي ورى الغيبه ونقله مهاويس
‎تشين خطرها على ادناة زله
يا الله جنبنا الخطا ودرب لابليس
‎وفرج عن اللي به من الوقت خله
هيضي نثرته بالبيوت النباريس
‎وبدع المثل يا باخنه عادة ٍ له
.
‎خالد الماضي السرحاني

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين