قل للذي غادي ويطرد ورى الشهره
وش عاد قدم لها من قبل يطلبها
العام يذكر عذاريبٍ غزت عصره
واليوم يمشي بها وغيره يعيّبها
أخلف مفاهيمه ومن حدره لحدره
نفسه تسوقه على الدنيا وخايبها
يركض ويجمع وكل يوم ٍ وله نشره
‎حتى ضعوف البشر ماغير يرقبها
داله بدنياه وعقله صابته سكره
واذنه عن الناصح الصادق مقطبها
يظهر بوجهٍ صدوق امغيّب ٍ مكره
مايحشم الناس ولايركض بواجبها
من زوّد مجامله يمل به صبره
ومن ذل نفسه فلا يامن عواقبها
نصيحتي من قبل لاتوخذ بغدره
اختر رفيقك ونفسك دوم حاسبها
ولاترتجي خاين المبدى ولاتشره
ولاخير في رفقة ٍ كل ٍ يقلبها
ولاتشتري وصل ناس مجهز ٍ قبره
‎اللي ليا جيتها صكت حواجبها
وابعد عن اللي ورى الأخبار منعهره
ولاتقرب اللي تردت في مذاهبها
وش لك بروس امحلت وانفوسها قفره
‎خلك كما الحيد نايف عن ترايبها
هل العزايم تهد الشامخ بقهره
ما تهاب وياويله اللي بشر يقربها
ما تنثني لضدها ولايفرح بكسره
والعز والطيب ورث ٍ ما يغايبها
انعاتب أيامنا ولا كلها كدره
تصفي لنا يوم وتكدر مشاربها
تقبل وتقفي ولانجزع ولا نكره
خضنا التجارب وشفنا من عجايبها
نصبر على وعودها وبصدورنا جمره
نرجي وفاها لو الجاهل يكذبها
مانمشي الميل ولكبد العدو حسره
وندوس روس الأفاعي مع عقاربها
ولانتبع القيل ومن يمشي به نخبره
ونركض ورى الغانمه ونرقى مراقبها
أيامنا مقفيه ونصبر على العسره
والخايب اعماله تنوشه مخالبها
واللي تذل الرجل وتحط من قدره
يحشم شواربه عنها لا يقربها
#خالدالسرحاني

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر - بواسطة شركة المبرمجين