ماقصدي الشهره - سحايب العازمي

سحايب أسمي والقصايد مكاني
والشعر شكل ولون وجروح وفنون

ماجيت أبّين صورتي دون أعاني
أنا المعاني تصنع لصورتي كون

ماقصدي الشهره وزيف الاماني
وحْبي مايشبه حْب ناسً يحبون

أحب من أقصى شعوري ولاني
مفتونه بحلم ومواعيد وظنون

بأسمى المشاعر والوفا والمعاني
وبأسمى المعاني والوفا قلب مفتون

لله در أقصى شعور أبكياني
بوحي حنين وغربة أحساس وشجون

طبعي أنا ماشكي على من نساني
ولا أذكر اللي لا تذكرته يخون

عندي وفا ساكن بحدب المحاني
وآصل المحبه للبشر دون يدرون

من حبني عند المواقف لقاني
واللي لقاني لحظة الصدق ممنون

سحابة الاحساس صادق حناني
وأعذب حروفي نزف والشوق مضمون

© 2022 - موقع الشعر