تسوقنا الدنيا على غير مشهاه - سعود الدهيمي

تسوقنا الدنيا على غير مشهاه
وتحدنا الاشغال منا ومنا

عن صاحبٍ رغم البطا مانسيناه
لو راحت ايام السنه مااتصلنا

ياصاحبي ياطيّب الصيت والجاه
العفو منكم والمعاذير منّا

حنا بذلنا جهدنا اللي قدرناه
ولاجت لنا الدنيا على مانتمنا

اليا اعترض سيلٍ صغير وقطعناه
لاعقبه السيل الكبير يتثنّا

ولاترانا صاحب الجنب نرفاه
ماتنقّل له هرجة الشين عنّا

نضيق من ضيقه ونرضى من رضاه
ولانعده غير رجّال منّا

طبعٍ لنا من روس اهلنا ورثناه
وبنموت ماماتت مذاخير اهلنا

من يستحق مواصل الطيب نرعاه
ونواصله حتى ولو ماوصلنا

نقدّر ظروفه وندمح خطاياه
ونجامله لين يتفرّق ظعنا

اليا اتصل لابد نضحك محياه
ونذكّره بالطيب كنتم وكنا

واليا انقطع من قوّ ظرفه عذرناه
مانشغله ونقول حنا وحنا

نبا اليامنا خطانا ارتكبناه
وقفّت بنا دنيا الشقا ماذهنّا

نجيه باعذار الوجيه المسمّّاه
ونقول كلٍ من ظروفه معنّا

ويقول معذورين والجاه بالجاه
لين يتقرّب شامنا من يمنا

شرواك يامن تكسب الطيب يمناه
ياصاحبٍ منه المشاريه جنّا

قل اتصالي حدّ قلبه على اقصاه
وغلاه نادى هاجسي له وغنّا

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر