مسلسل الحياله

اختلف طبع الحبيب ولااختلف منزاله
منزله بين الضلوع وصورته محميه

في علو القلب حبه بانيٍ تمثاله
والبنا ثابت على سيسانه المطويه

قد بذرنا الود بذر ولاذبحنا آماله
لانما عوده نفييله من الماويه

وان ظما يسقيه فيض القلب من شلاله
لين حتى انه قوى عوده وجاله فيه

ود من عيني تتوق لشوفته واقباله
وهو يبادلني شعوره والمشاعر حيه

آصله في كل لحظه واشتهي لوصاله
وهو يسابقني اليا ماجيتله بالجيه

ذاك ود العام وده هالسنه يرثاله
تنقصر من دون بيته خطوتي جبريه

كثرت الرديان حوله صعبّت ميصاله
اربضن لي فالطريق الداب جنب الحيه

واكثر النعمه كلتهاالآفه الاكاله
والبعير الآركي والناقه الجرميه

ان سكت اليا السكوت اخس واردى حاله
وان هرجت محرفين الهرج شكوا فيه

ولاّ انا خابر عذولي نيته بطاله
لايدانيني ولا ادانيه بالكليه

ينقض الحبل الطويل ويوهم الفتّاله
ويتضاحك بالسنون وعلته مخفيه

كل ماشفته ذكرت مسلسل الحيّاله
لاقعد يظهر طرف هذي ويخفي ذيه

البلا انه لاوقف قدمي تزين اقواله
ولااختفى عني يحيك النيه الملويه

وصاحبي يسمع كلامه مايشوف افعاله
غشّه الغشّاش بالضحكه وسّوّ النيه

ياحبيبي لاتسمّع في كلام العاله
الكذوب تبين لك في هرجته ماريه

والله اني مخلصٍ لك والوفا مشتاله
ولو يدور الوقت قلبي ماتحصل زيه