يامرحبا بشيوخ شمل الشيابين - سعدون بن فهد الهرس

يامرحبا بشيوخ شمل الشيابين
ترحيبة فيها شذى ريح ريحان

حياكم الله يالرجال المديحين
اللي لكم في صرح الامجاد عنوان

سلطان بن ماجد حجا المستجيرين
يلوذ به من ذاق لوعات الازمان

ونايف ولد ضاوي ربيع المقلين
وافي وجدانه لهم بالوفا شان

انتم سلايل ملحقين المخلين
لاجا نهار فيه زوغات الاذهان

تعرف مواقفهم على العصر والين
من عصر اخوهملا ومصلح وسلطان

ياما خذوا من مال قوم عزيزين
وياما ثنوا من دون حلوات الابان

على النقا ماهم على البوق ضارين
يوم الطراد ويوم دقلات الاضعان

على السبايا والنضا مستعدين
لمصافق الغارات في كل ميدان

ومن بعدهم ضاوي نحاز المعادين
وماجد زبون الجاذيه يوم الاكوان

نزه الجناب اللي و قف مع هل الدين
ناصر معزي وانتصر مع كحيلان

في ضف اخونوره صعوط المجانين
حقق مطاليبه وللعهد ماخان

واليوم في حكم الملوك الموامين
وحنا لهم دايم على الحق عوان

الله يعز ملوكنا قولو امين
فهد وعبد الله ونايف وسلطان

المومنين العادلين المسمين
ذروه هل العوجى مذاخير مرخان

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر