ياسلام الله على اللي جيّتي من شان طيبه - سعد بن عبدالعزيز الذيابي

ياسلام الله على اللي جيتي من شان طيبه
ما التمست العذر فالواجب اليا منه دعاني

من رجال زحول والديره مصايفنا الحبيبه
وعيبهم فالكيف خلط البن فوق الزعفراني

الكرم موجود والاخلاق وقلوباً لبيبه
والعرب يدرون مافي القلب يطلعه اللساني

من زرع للطيب حصل نعم هذا من نصيبه
يزرعه فاللي قريب وفالبعيد وفالعواني

والنعم ماهوب مستغرب على ربعي عتيبه
حقهم هذا بدون إقصور في قاصي وداني

شوف مبطي كاسبه مافيه شك ولاش ريبه
النبا الطيّب تراه يسد عن بعض المعاني

فيه مجلس فيه همز وفيه شر وفيه غيبه
ومجلسٍ يرفعك فوق الجدي وسهيل اليماني

الادب كسب الرجال اللي مناسبهم عريبه
وأنت وش تختار انا بين الرجال اعرف مكاني

الصقور تحب ميقاعاً على راس الرقيبه
والطيور الثانيه ترتاح للارض الطماني

وان عطوك الكيف فاشرب زلّته واترك سريبه
إنشد مجرب ويعطيك الحقايق والبياني

لاتحزم لك برجل عن اللوازم فيه هيبه
مايخل اللازمه ياصاحبي غير الهداني

ورجل ما يعز دين الله دعه لا تنتخيبه
دوّر الرجل الشريف اللي خويّه مايهاني

والردي ساسه ردي عند الطلب ما نعتزيبه
قالوا اهل المعرفه محد لقي بيض السماني

الردي ساسه ردي كلٍ يذوده عن قريبه
والحساني ياوسيع العرف تجزا بالحساني

الردي ودّك على راسه يحطون النصيبه
مايفيدك فالحياه ولن هلك نقول فاني

والكريم الله يجيره من صواريف المصيبه
والشجيع الله يحفظه يعتلي ظهر الحصاني

والختام العود الازرق نحرقه ويزيد طيبه
طيب لاهل الطيب والرديان تبقى دور ثاني

© 2024 - موقع الشعر