ياناس انا عندي مثايل مرتبه - سعد بن عبدالعزيز الذيابي

ياناس انا عندي مثايل مرتبه
اسوقها للي يباها سوق

اسوقها سوق المطيه مدربه
والناس كلٍ له مزاج وذوق

ومناسبتها من تغير طباعنا
فالبر والا فالبلد والسوق

ضاعت شيمنا والنسا زاد حكمهن
وماعاد يبقى للرجال احقوق

وتبريرهم هذا زمان التطور
شييٍ ظهر ماعاد به مدروق

مارية الرجال طول ثوبه
واما الفتاه ثويبها مشقوق

وتقصره حتى تبين الركبه
وتقول هذا زينتي للشوق

معظم شباب اليوم تبع الموضه
حجتهم الموضه تطلع فوق

واذا فحصنا قولهم لا نصدقه
تقليد الاعمى مايجي مرموق

اوصيك ياللي كل حكمه تحبها
اخذ الحكم من داخل الصندوق

الاوله حافظ على الدين والحيا
وترى النشامى ماتحب البوق

والثانيه للوالدين التواضع
وخفض الجناح وحقهم مطبوق

والثالثه جيران بيتك تعزهم
لعل مايلقى عليك اطقوق

والرابعه رافق رفيقٍ ينومسك
الصقر ماهو صيفة الغرنوق

وربعك ذراك اليا حدتك الشدايد
خلك لهم صافي لا جاك العوق

شجع صغار الربع واكرم كبارهم
وخلك حكيم ولا تجي مصفوق

وابذل لهم مالك ورايك وفزعتك
وكلا مك إلهم طيب المنطوق

واليا بغيت النسب جود مناسبك
والدين اساس ومابقي ملحوق

ولا ترخص الشيمه ولا تظلم الملا
ولا تطعم اولادك من المسروق

وابعد عن اطناب الردا لا تقاربك
هاذي نصيحه والمثل مطروق

ابعد عن الرديان لا طاب فالهم
فالبعد عنهم مايجيك ارهوق

ومن لاصبر ماحصل المجد والثنا
وانا على هذا المثل مسبوق

والعلم نور وزينة العلم بالعمل
علم الشريعه صح فيه إشفوق

ماهوب علم مقلد الكفر والنسا
بطول الاظافر والشعر والطوق

شبابنا اللي لابسٍ خلخاله
والوجه بارد والدقن محلوق

ويقول يابدوان بالله تعلموا
وجوزوا من التمره ودر النوق

حنا نحط مكسرات وحلاوه
ومن فعلها صرنا وساع احلوق

وش فايدتكم تذبحون البهايم
حتيش لو جا رزها ممروق

واقول هذا واجب الضيف نكرمه
هاذي طبايعنا وانا ابن روق

وختامها مني صلاةٍ على النبي
وذكر الله اللي يرزق المخلوق

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر