الفيه

(الالف) الفت القصيد ابجزاله
والهاجس اليله بدعّ ما طراله

يامن درى الي غاب شلي جراله
فارق وانا من غيبته كلي احزان

(الباء) بلاني ف المحبه وقفي
وانا سقيته حب صافي مصفى

مايدري ان القلب بعده تحفى
والعاشق امسى من طواريه زعلان

(التاء) تناساني وانا الي هويته
ماحس بي وانا اذكره مانسيته

احلا ليالّ العمر يومي لقيته
واخر محبتنا غدت في خبر كان

(الثاء) ثنيت الحمد لله ربي
الواحد الي عالم(ن) وش نخبي

حتى المطر باامره تعالى يصبي
يعلم اب منهو يوفى العهد ماخان

(الجيم) جريت المواويل من ضيق
ماجبتها يالربع نسخ(ن) وتلصيق

مثلي حرام ان الزعل فيه مايليق
بس الزمن لوزان ف نهايته شان

(الحاء) حديت النفس عن كل هافي
وعرفت من هو خاطره غير صافي

وجعلت بشت العز دايم الحافي
وخليت منهو يسمع افلان وفلان

(الخاء) خلاص من المحبه انا تبت
الحب بلوه مير انا منهّ وش وجبت

غير التعب وجروح توجع ولاطبت
يارب تسقي كل من كان عطشان

(الدال) دونت القصايد اب كراس
كتبتها من هاجس(ن) عذب واحساس

ماني من الي يستمع هرج الانجاس
احب كل العالم اب طيب وإحسان

(الذال) ذاب القلب من غدر الاصحاب
الي حسبناهم من قلوبنا اقراب

ماكنت اظن اب يوم نب نرجع اغراب
لكن خساره صادق القلب خسراان

(الرا) رداة النفس ماهي غريبه
عند الردي تبقى يلو بان شيبه

تلقاه عند الناس نفسه كئيبه
ماعز نفسه دايم الدوم منهان

(الزا) زمنا مايضلي ولو طال
في كل يوم تلاقي انسان رحال

ماينفعك في دنيتك غير الاعمال
لابد ماتفنى لو اطول الازمان

(السين) سو الخير تلقاه قدام
وتبع شريعة ديننا حسب الاسلام

لاتتبع الشيطان تغريك الاوهام
يارب رحمه منك ياعالي الشان

(الشين) شفنا من زمنا عجايب
وذقنا من اطعون العداء والقرايب

ومازال قلب الذيب ماهو ابهايب
غلطان يالي ودك اطيح غلطان

(الصاد)صدينا عن اهل النميمه
ترى النميمه تاليتها وخيمه

ماتنفعك تبقى ذنوبك عظيمه
والي تبعها يقضي العمر ندمان

(الضاد) ضدينا العداء كلهم ضد
والي تحدانا على العسر ينحد

مانرحمه لونه امعرب من الجد
هذا بسوق المرجله ماله اثمان

(الطاء) طريته يوم انا كنت سالي
وهلت دموع العين من ضيق بالي

من فرقته ياويلي وبري حالي
يارب تلهمني مع الصبر سلوان

(الظا) ظلمني ف الهواء يوم صنته
ماخاف ربه فيني وقال خنته

مايدري اني في شقىء الوقت عنته
الله يسهله على وين ماكان

(العين) عيت ترقد اليل ترتاح
تسهر طوال اليل ولا النعس راح

ماعاد شافت شي(ن) ايجيب الافراح
هذا القهر دايم يخليك سهران

(الغين) غنينا على دان دانه
والطيب اشهد له بقلبي مكانه

بوقف معه لونه تعكر زمانه
يستاهل الي من رجاجيل شجعان

(الفا) فديت الذيب من طيب راسي
لجله الين كل قاسي وقاسي

نكسب ذهب مانخسر الا النحاسي
هذي عوادينا عزيزين واخوان

(القاف) قفلنا عن البعض الابواب
والي تكبر ياعرب ياكل تراب

ماهو قصور(ن) في فطينين الالباب
بعض البشر قلبه من الحقد مليان

(الكاف) كف الشهم بالجود تعطي
دايم كريم(ن) والكرم فيه مبطي

هذي حقيقه لاتقولون مخطي
عزالله ان شرواه في موقفه بان

(الام) لامونا وحنا كريمين
يبغون طيحتنا وهم ناس مخطين

في ذمتي ياهيه مبطين مبطين
ماحركونا دامنا سيل وديان

(الميم) ماراعي هروج المهابيل
ياالله عساهم للشقىء والبهاذيل

ماني براجي من وراهم محاصيل
هذي عوايدهم على طول رديان

(النون) نار(ن) ف الحشاء قامت اتشب
من حرها ك الجمر لاصار يلهب

مافادني فيها علاجات مع طب
والظاهر اني طحت ياناس مرضان

(الها) هقيت انه يكمل مسيره
وياللاسف بيديه قرر مصيره

ياالله عساها بتالي الوقت خيره
واجبر بخاطر كل من كان ولهان

(الواو) وردني حياض المنيه
وضيع حياتي بين روحه وجيه

ماكنت اظن ان الياالي دنيه
تمسيك جايع لونك اصبحت شبعان

(الياء) ياعل الله يغفر خطانا
ويحسن خواتمنا ويرفع بلانا

ويحقق الاحلام مع مبتغانا
يارب نطلب منك عفواً وغفران

الشاعر نايف الرشيدي