يامحمـد الروضـان هـذي مقاديـر

رثاء في الفقيد الشاب /علي عبدالله الروضان
غفر الله له ورحمه

يامحمد الروضان هذي مقادير
واللي كتب باللوح مامنه فرقا

حكمة ولي العرش مجري التدابير
اللي يدير الكون غربٍ وشرقا

القلب من ما صار يبكي من الضير
والعين بأقشر دمعها اليوم غرقا

لا يا عديل الروح تشكي المعاسير
لامن نزل أمر فلا عنه مرقا

واللي يبيه الرب ماله معاذير
لو كانت أرياق المحاذير شرقا

علمٍ فجعني شين ماله تعابير
فزيت ويديني من الغبن عرقا

قالو (علي ) صابه من اللهِ تدابير
وتبدلت بيض الليالي بزرقا

رح يا(علي). . ياعل ماصار تبشير
لك بالجنان وعند مولاك ترقا

رح يا (علي) . . الله يذكرك بالخير
لك بالشرف بين الأجاويد طرقا

رح يا(علي) . . ياعل ما جاك تكفير
وينجيك ربي من عذابٍ وحرقا

موتك شرف مافيه ( غطوٍ) و( تفسير)
واللي جرى لك صار غدرٍ ودرقا

أحسنت (للعامل) على نية الخير
وجازاك بالمعروف (طعنٍ) وسرقا

ولو دونك العالم دروع وطوابير
سهم القدر من بينهم جاك زرقا

ويا عيال أبن روضان ربعي المناعير
تشهد لكم بالطيب (روق) (وبرقا)

لكم على الطولات ثبت وتقارير
ووسمتو المعروف عرقاً وعرقا

ربي يبدل حزنكم بالتسارير
وتسجع سعادتكم على كل ورقا

عبدالرحمن عبدالله المجلي - راعي مرات