يا جارنا هذي ثلاث ايام ما جانا وذاك
لا يا عسى ما شر جالك مدةٍ ما اوذيتنا
حنا اقرب الجيران واولاهم بطيبتك ورداك
وعودتنا على الشقا نستغرب ان ما اشقيتنا
يا جارنا طالبك في جاهك لا تبخل في خطاك
عجّل علينا بالخطا لو بس تكسر ليتنا
حنا شرينا الليت للتكسير وندور رضاك
وان ما اكتفيت بكسرته عوّد على ونيتنا
يفداك موترنا وشارعنا ولمباته فداك
وان ما كفاك اللي ذكرنا لو تصدم بيتنا
ولا تخلي بصدرك ولو كلمه ما تسمعها اقصراك
جالك ثلاث سنين موذينا لكن مكفيتنا
الله يرحم جدك الاول ويرحم من رباك
اسقوك من كاس الوذيه وانت منه اسقيتنا
انشهد انك فالخطيه ماحدٍ يلحق مداك
وانشهد اني ما خبر لك ليل ما صجيتنا
يا زقنك اورعانك الموذين ما نلقى حلاك
حنا نفكر في شرا ذالبيت وانت اغريتنا
الله يرضالي على ورعك ويرضالي علاك
يا مطيب البوري ليا طنبته وصحيتنا
ما فيه داعي للهدو لا يا بعد هذا وذاك
اغنيتنا عن كل جيرانك ولك صديتنا
لو ان سكان الرياض تعرفك وتسمع لغاك
يمدي الخليقه مستسره مثل ما سريتنا
الله جزاك بفعلك الطيّب وجاك اللي ولاك
اكرمك من منهج يالموذي مثل ما اعطيتنا
افرح فرحنا يوم جاورناك لا منه زواك
وحنا نبي نذبح نذر من عقب ما ساويتنا
ولا رحت تشري ليت حاول تشتري لنا معاك
ركب ابيتك وحده والثانيه في بيتنا
وان كان شددك الفتوّه حاول تزور قصراك
وسلم عليّه بعد ما حبيتك وحبيتنا

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين