المرآيا أكسـريهن ( لعن أبو ) كل المرآيا - عبدالرحمن بن عبدالله المجلي

المرآيا أكسريهن ( لعن أبو ) كل المرآيا
كان ما شفتي جمالك في عيون اللي يبيك

والشظايا أتركيهن لاتلمين الشظايا
جرحهن في القلب ينزف ..عنّك : لاتجرح يديك

والنوايا (حب ذاتك) صار قصدك والنوايا
لانظر لك شخص.. معجب.. جاك عزٍ ينتشيك

لون ( ميشك)عندك أنتي صار أكبر ها القضايا
أصبغي شعرك بدمي لون ما يخفى عليك

والشفايا يا كذبهن.. آه.. من هاك الشفايا
ما صدقتي يوم قلتي ( طول عمري بأحتريك)

والندم مني تمكن ..ياهو سوى بي سوايا
ليتني ما جيت يمك..ليتي ما صحت أنتخيك

والوصايا يا كثرهن ! طاح قلبي من الوصايا
ما( تأمل)! ما( تحمل)! ليش يهديني إليك؟!

والخطايا أدمحيهن.. كان زليت بخطايا
جيت ظامي من صحاري شوقي أبغا أرتويك

والعطايا لك ( عيوني) صارت أرخصهن عطايا
بعت عمري والمشاعر كنت جازم أشتريك

والهدايا أقبليهن ياغليهن من هدايا
(همي) و(دمعي) و(حزني) و(سهد) توه يبتديك

والبقية في حياتك.. صرت من بعض البقايا
أحرقي كل المشاعر عل غيري يحتويك

وكفني (حبي) و(عرفي) واقبريهن في الحنايا
واقبلي في (التعازي) ولا تجيني ولا أجيك

عبدالرحمن بن عبدالله المجلي- راعي مرات
© 2024 - موقع الشعر