الهزيلـة مـا تجـي لــه والجزيـلـه للجـزالـي

كتبها الشاعر عبدالرحمن المجلي في أخيه معالي الشيخ عبدالعزيز المجلي ابو بدر
الهزيلة ما تجي له والجزيله للجزالي

سلم الله رأس من هو دوم حملي يرتكي له
وطيب الله ذكر من هو دوم ذكره فوق عالي

يخجِل الغيمة بفعله والبشر دايم تخيله
فعله وطيبه وجوده ماهو خصٍ لي لحالي

عمّ خيره للبرايا مثل همال المخيله
إن مدحتِه عجز قولي ..بح صوتي عزتالي!

عزتِي للي يجاري فعل ( أخويه) عزتي له!!
لاارتكا للحمل شاله.. دوم شيله للثقالي

وماشكى من ثقل حمله ..حمله اللي يشتكي له!
إن نخيتَه ماتوانا..قال أبشر ياحلالي

سعدّ ( عين) أللي أخويه جاك فازع ينتخيله
هو أخويه؟!..أو أبويه ؟!.. وإلاعزي ورأس مالي؟!

ولّ يا ضيم الليالي دون أخويه كيف أشيله؟!
ماذِكر بالفعل مثله.. حتى ماضين الفعالي

فعله اللي فاق وصفي صار عنوان الفضيلة
فاق (عنتر).. فاق( حاتم).. حتى (أبو زيد الهلالي)

(بالشجاعه) و(الكرامه) و(المواجيب) الأصيلة
(بو بدر) لامن لجو له ضيقهم والهم زالي

(بو بدر) لامن عنو له طابت كبودٍ عليله
(بو بدر) لامن سرو له ينجلي هم الليالي

(بو بدر) صيته وفعله صار عزٍ للقبيلة
(بو بدر) رأس المراجل والمراجل له تلالي

والمراجل لاداعاها جت ( تراكض) تنتشي له
تعب (كفي) عجز (حرفي) ما كتبت اللي في بالي

والعذر يا( شيخ) والله كان ماهيب الجزيله
عبدالرحمن عبدالله المجلي - راعي مرات