لــه القـلـب يشـتـاق

يا مرحبا بللّي له القلب يشتاق
شوف الظّما للماء إلبرد الهوايف

ويا هلاً عدد ما ناض في السّحب برّاق
واسقى بوبله ممحلات الكفايف

ويا هلاً عدد ما ينبت العشب لوراق
واعداد ما تذري هبوب المصايف

واعداد ما للسّبّق الخيل مطلاق
وما درهمن عسم اليدين الخفايف

يا والله اللّي نلت به سعد لوفاق
والحظّ من طبعه يجي بالصّدايف

واختص من هو لي محبّ وصدّاق
وأنا مودّ له حليفٍ وضايف

بني الصّداقه بيننا في لوثاق
منحوت صخره ما بني بالسّعايف

اذري بهم مذرى السّفن وقت لوهاق
واعدّهم ذخر السّنين الشّفايف

يا من يلبّيني غلي خاطري ضاق
وأنا ملبّي له قريبٍ وطايف

والله لبذل لو على قطع لرزاق
عمري واسوم الرّوح سوم التّلايف

وارضيه لو تزعل مخاليج لآفاق
ولا نيب من حدّ سوى الله خايف

لجله احمّل خاطري فوق ما طاق
وافزع و لو تكبر عليّ الكلايف

اطيب من طيبه و من عوقه اعتاق
وارتاح لي شفته مريحٍ ورايف

يشكي جروحه من سبب تلع لعناق
لي نظرته فيها الولع والحسايف

عين العزيب اللّي من الزّول فرّاق
ينذار لي من شمّ في القفر حايف

يكسيه مزويّ على متنه اطلاق
خشف العزال اللّي يقود الولايف

لي من ردوفه يشتكي مدمج السّاق
له الحشا منهوب والخصر هايف

عليه من حلو الملابيس ما لاق
يختال في شيل الرّهام الرّهايف

يدني الخطا مثل القطا مشيه ارفاق
حذرٍ وسيره في دروب التّقايف

خلّ دعاك ابمهمه الشّوق مشفاق
تعوي كما السّرحان في كل نايف

هاذاك لي يبري مدافين لعواق
شوفه وتبقى يا عديم الوصايف

وانختمها بللّي عرج سبع لطباق
صلاه نهديها تخصّه رضايف

الهادي المبعوث والصّحب لرفاق
اعداد من صلّى وبالبيت طايف