باب الرجاء في الله.. ماهوب ينصك
وحبل اﻻمل ياخوي حذرا تفكه

على جبينك ماكتب للشقى صك
هذا الكلام الثبت مافيه شكه

وماقدر الرحمن ياقع ويدرك
مالك عن المكتوب ملجا .. وسكه

ولو الهموم جبال ..لابد ..تندك
زبر الحديد ..الطرق كثره .. يفكه

واجزم على الكايد.. إلى ناشك ..الضك
ولا .. يرتخي .. حبلٍ ايدينك تتكه

وترى الحياة دروس.. لابد ..تعرك
صروف الدهر معدنك غصبٍ تحكه

ومن شال حمل المرجله .عيب . يبرك
حملٍ على كتفه والآخر يعكه

وبيت القطاعة لايجي حول مبرك
نجم من الخلاق عجلٍ يدكه

واللي بدا في رفقته ريبه وشك
خله عسى للذل بقعا تصكه

امقيط..عطه رشاه ..يالقرم وافتك
واهل الحجاز أعرف بشعبان مكه

هذي نصايح مابها ..زيفٍ .. و عك
جنيه الذهب عند الصيارف تسكه

عبدالرحمن عبدالله المجلي
– راعي مرات


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر