التقييم
من هيض هاجوس القصيد اللي تهيض بْه الصدور
شَفّ الخيال الشره يرقى معْ بعيدات المنال
لو اسهرت عيني وتعب الفكر ماني بمعذور
عندي مهمه واتحمّل لجلها دْروبٍ طوال
رقيت عسرات الجبال او غصت غبات البحور
صيد الشوارد غايتي لو دونها بْحور وْجبال
ابي الى من كبرت الظاله وجاءْ للشعر دور
والسالفه تدرج ومعها الكيف في صفر الدلال
ثم انصتوا لمسيرات المعرفه كل الحضور
ما اقول قول الا يجمّلني مع وْجيه الرجال
لا خذت دوري جبت لي باقه من وْرود وْ زهور
من مصدر اجزال الهجوس اللي كما العذب الزلال
احشم جناب الشعر واقدّر طويلين الشبور
اهل الحكم واهل الشعر واهل المواقيف الجزال
لهم عليّه حق والتقدير والطيب مْخبور
عند القروم اللي تروم المجد واكرام السبال
شروى الحضور اللي بكسب المدح ما فيهم قصور
زحول الرجال مْبددين الخوف في شهب الليال
فيهم نوادر مهجتي تطنخ ومعناها فخور
روابعٍ تطرب لها افكاري ويبدعها الخيال
الشعر عندي معتبر وابدعه من صدق الشعور
ولا بدعته طالب الشهره ولا شحاذ مال
ماني كما اللي يمتطي صهوته من شان الظهور
في كل وادي به يهيم وْ لا بنى بنوه هيال
وقام يتبهرج بالقصيد ويلبس ثْياب الغرور
يشوف ما لاسمه نديد وْلا معَ امثاله مثال
والشعر ما يرفع مقام الرجل لا صار مْعثور
ان كان ما به دين معْ طالت ذراع وْ طيب فال
وكرامةٍ ترفع مقام الرجل عن بعض الامور
اللي تشوّه سمعته لا هام بدروب الظلال
واختامها نفحه من الكمبود معْ بنّة عطور
يفوح معها من شذا شعري تماثيلٍ جزال

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2004 - 2019 - موقع الشعر