الصندوق الاسود

ياهل الطيّاره اللي جالها فالجو حومه
فوق هام السحب تقلع من مدينه لا مدينه

دامكم فيها شراكه جنّبوا درب الخصومه
المصير المشترك يجمعكم بْزينه وشينه

واسمعوا راي الحكيم اللي كلامه في تمومه
واتركوا راي الضعيف اللي لطم بيّديه عينه

خلوا الصندوق الاسود لا حدن يبحث علومه
ما ي عرف سره سواء الطيار والا مْساعدينه

من يبي شوري ما يشقى به و لا يدفع رسومه
دام يتحكّم به الكبتن وبعض مْقرّبينه

فارضٍ رايه عليه وْحسب وقعه معْ ختومه
في شماله ياخذه مرّه ومرّه في يمينه

ناس تنهب منه بيديها وبهْ ناس مْحرومه
محللينه لجل ناس ولجل ناس مْحرمينه

وكان ما جمّل على اهل الشان لا حصحص لزومه
وْهم على مر السنين اللي توارت داعمينه

اتركوه إلين ينضب نبعه وْ تذهب غيومه
وينتهي رصيده اللي للشدايد ذاخرينه

طالما الكبتن على الرحله مّسوّي له حكومه
واصبح الصندوق الاسود في يده مثل الرهينه