المشيخه بالوراثه

المشيخه بالوراثه يازحول الرجال
تنصّب اهل الضعافه فوق روس القروم

يركب على اشدادها خبلٍ علومه هزال
ويعد نفسه بطل لو ما يسد اللزوم

ما كل شيخٍ يخلّف شيخ في كل حال
كم من عقيدٍ ما خلّف بعده الا رخوم

وكم واحدٍ معْ هل الطاله ما يسوى ريال
اصبح بحكم الوارثه قايد وْ شيخ قوم

والمشيخه ما هي بْرزه وبشت وْ عقال
وْ لا هي بكثر الحلال وْ لا بكثر الختوم

الشيخ من يحتمي ربعه نهار القتال
والشيخ من هوْ لربعه فالمواقف خدوم

يرسي الى من دعى الميقاف مرسى الجبال
ويضل ربعه عن الشدات مثل الغيوم

والى حصل بين ربعه غيض والا شكال
يحضر ويصلح ويرضيهم بطيب السلوم

وله منهجٍ واضح وْ صارم ورايه عدال
سيفٍ بريعٍ يهابونه جميع الخصوم

وثلاث فالشيخ عارٍ واضح ابلا جدال
البخل والحقد واتسمّاع هزل العلوم

لا صار همه يقول افلان وافلان قال
ويجمع هروج الضعافه من لسان النموم

ومعه بطانه من اهل المكر والاحتيال
يخدم مشاريعهم في كل ليلٍ ويوم