حبيبي ؛ أنت يا عمري.. بأشوفك يا هوى العينين
أبي وياك ؛ يا الغالي .. وعينينك ؛ بعينيني
عقب فرقاك يا عيوني .. وحشني فقد شوف الزين
باشوف ؛ الناس عندي.. يا حبيبي ؛ زينهم شيني !
أفكر فيك ؛ ساهر .. في خيالك ؛ وأنت غيرك مين؟!
ولا مثلك ؛ ولا غيرك .. ولا شخصٍ ؛ يهنيني
وعليك أغار ؛ غيرة.. مغرمٍ ؛ في عالم الغاوين
تهزه رعشةٍ بجنون .. غاير ؛ بين غاويني
يا ليت ؛ أمر بإحساسك ..ولا أدري ؛ أروح لوين؟!
بأعايش ؛ هاجسك فيني .. ولو وينك ؛ وأنا ويني؟؟
أو أنت ؛ تمر بإحساسي .. ولو عابر ؛ لمين ومين؟؟
وتتوه ؛ بخطوتك وتضل .. عمري ؛ عايشٍ فيني !!
أبي ؛ أسمع سواليفك.. وأحاكي عيونك ؛ الحلوين
وأنا سارح ؛ من البارح.. لهلا ؛ فيك يا عيني
تعال ؛ نحط كفينا .. سوى ؛ في قبضة الكفين
وعينينك بعينيني .. وكفينك بكفيني
وشعوري ؛ يذوب بشعورك .. يصير شعور ؛ بشعورين!
وتعاطفنا وتعانقنا .. ويدينك بيديني !!
ومشينا ؛ بدربنا الحالم .. بحلمٍ صار من حلمين !
وتقاسمنا ؛ هوى الهاوي .. وجينا بين قوسيني !
بأحاسيسي وأحاسيسك نعيش إحساس بإحساسين
عواطفنا بمعنى الحب .. تنبض بالشراييني
ونفهم ذاتنا ؛ في فهم.. واحد ؛ ما يجي فهمين
ولا شيء؛ بدنيانا .. يفرق ؛ بينك وبيني
بنفسٍ وحدة نتنفس.. بروحٍ ؛ تنعش الروحين
ونعيش ؛ بروح وحدة .. بالهوى ؛ بلاش روحيني
ونبض قلوبنا ؛ في قلب.. واحد ؛ ينبض الحبين
وتصبح ؛ حب واحد.. بيننا ؛ ماهيب حبيني !!
ولا به شيء ؛ اشوف الا .. وهو يرضيك أنا يرضين !
ولا به شيء ؛ ما يرضيك.. فيني ؛ دام يرضيني !
ولا شيء ؛ يميز ذوقنا.. ما بين ؛ شين وزين ؟!
بذوقٍ ؛ واحدٍ رائعْ.. مميز ؛ بين ذوقيني !!
ومركب حبنا ؛ نرفع .. شراعه ؛ في هوى الهاوين
ونبحر ؛ في أمانينا .. إثنين ؛ لبعض هاويني
وعلَمْنا نرفعه بالحب .. يلفح ؛ في هوى القلبين
ونتبادل تهانينا .. واناديك وتناديني
بلا شاطئ ولا مينا .. ولا اسطرلاب ؛ ليل وعين!
نردد ؛ في مواويل البحر؛ ما بين بحريني !
نجدَّف بالأمل ونقول : ينقذنا (أبو القرنين)
ولو نبقى العمر كله.. لوحدينا ؛ إحنا الأثنيني
وكل الناس ؛ ننساهم .. مثل ماهم ؛ لنا ناسين
ولا نفكر ولا نحكي .. بسيرة ناس ناسيني
بلاش نعيش دنيانا .. من الحساد محسودين
ونحياها ؛ مثل شخصٍ .. فقد دنياه والديني!
تروح ازعاج ناسٍ ..بالنكد والنحس متربين
بلا معنى ولا متعة .. ولا أحباب وافيني
جزاء الإحسان إساءة خاتمة تأتي من الغالين
وتلقى أعداك من ناسٍ.. بقلبك حيل غاليني
ولا يوجد ولا أنسان ,, لو يبحث عن الوافين
ولو هو ينٌخدع في ناسٍ .. ماهم بالفعل وافيني

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين