رجال

لـ أسعد السحيمي، ، في الحكمه والنصح، آخر تحديث

رجال - أسعد السحيمي

لو ندري إن الناس تزعل على ماش
ماكان راع الماش ؛ لحظه قربناه !

ولو كان طعم المرّ ؛ مدفون بالكاش
أحيان طعم الكاش بالناس محلاه

والموقف الحساس ؛ يِظهر لك اللاش
ويِفرق لك عيوب الرجل ؛ عن مزاياه

رجّال قلبه ؛ دايم أبيض من الشاش
ورجّال ليل ٍ وأسود اللون ؛ يغشاه

ورجّال يقنع لو على خبز ؛ يعتاش
ورجّال مايقنع لو البنك ~ يملاه !

ورجّال لو تنخاه في موقف إنحاش !
ورجّال يقضي لازمگ يوم ؛ تنخاه

ورجّال باش ؛ ولا أرتكا للحمل باش
ورجّال ماش ؛ ولا يسرّك بممشاه

ورجّال واش ولا أجتمع بالبشر واش
ينقل علوم الناس ؛ ويزيد ~ بوشاه

ورجّال ماعمره صدق ؛ دوم بكاش
ورجّال قول الصدق ؛ طبعه ومبداه

ورجّال لو كلمه سمعها ؛ بها طاش
ورجّال ؛ مايهزّه كلام ٍ ~ تقفاه

ورجّال (تكفا) لا جِته وقّف وشاش
ورجّال لاجيته بها ؛ هزّ علباه !

ورجّال ل أشواك المقادير منقاش
ورجّال في وقت الصعيبات مزراه

ورجّال لعلوم المخاليق ~ نباش !
ورجّال لو شاف اللذي شاف غطّاه

ورجّال لو تنصاه ؛ تلقاه ينداش
ورجال يبهج خاطرك ؛ يوم تنصاه

واكبر غنا هي نفس ربّاطة الجاش
وابخل بخيل ألي رفض ساعة الجاه

لاتدمج الأوكار من ضمن الأعشاش
الحر حر ؛ ورايته ~ فعل يمناه

سلمت ياراس ٍ ؛ على المرجله عاش
ولا عاش راس ٍ صاحبه يوم ؛ وطّاه

أسعد السحيمي
© 2024 - موقع الشعر