نيل المعالي ماتجي دون مجهود
والمجد ماكلن حصل به شهاده

ومن لايقود الصعب في طاعته قود
يبطي يدينه ما تمس القياده

ولا كل متمني مع المجد موعود
الناس تفرق في صمود الاراده

ومن يطلب العليا بذل نفسه وزود
والمجتهد يجني ثمار اجتهاده

مبروك ارددها بلا عد وحدود
تستاهل الرتبه وفال العماده

لن الوفا ياطيب الفال مرصود
فيكم الين اصبح لكم خير عاده

ومثلك ياابو عبدالله افعاله شهود
النادر اللي يعجبك في هداده

رباك ابوك وقدها كنت وقدود
تمشي الطريق اللي رسم في ركاده

روّض لك الصعب وفرش دربك ورود
يالله عساه يعيش عمره سعاده

كبيرنا اللي لابغيناه موجود
عنده من الحكمه علوم وافاده

يجود يوم النفس من جودها اتجود
دايم على الفزعات نلقى اعتماده

والشبل لامنه تربى مع اسوود
مايستريح الا ينال السياده

وهذا انت صنت المجد في جد وجهود
وعساك لامجادا بَعَدها زياده


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر